दिल्ली : अहमदाबाद विमान अपघातानंतर देशभरात शोकाचे वातावरण आहे. पंतप्रधान नरेंद्र मोदी आज अहमदाबाद दौऱ्यावर आहेत. त्यांनी अपघातस्थळाला भेट दिली असून जखमींनाही भेटणार आहेत.

पंतप्रधानांकडून घटनास्थळाची पाहणी आज सकाळी सुमारे ८ वाजून ३० मिनिटांनी पंतप्रधान नरेंद्र मोदी यांचे अहमदाबाद विमानतळावर आगमन केले. त्यानंतर, सकाळी ९ वाजण्याच्या सुमारास त्यांनी दुर्घटनास्थळाला भेट देऊन परिस्थितीचा सखोल आढावा घेतला. त्यानंतर ते सिव्हिल हॉस्पिटलमध्ये जाऊन जखमी झालेल्या व्यक्तीची भेट घेणार असल्याचे समजते. 

 मदत कार्य थांबले अहमदाबादमधील विमान अपघातानंतर मदतकार्य आता थांबले आहे. अपघाताबाबत एअर इंडियाने एक निवेदन जारी केले आहे. एअरलाइनने म्हटले आहे की, अपघाताच्या वेळी विमानात एकूण २४२ प्रवासी होते, त्यापैकी २४१ जणांचा मृत्यू झाला. फक्त एक प्रवासी वाचला आहे, ज्याला उपचारासाठी रुग्णालयात दाखल करण्यात आले आहे.

विमान अपघाताच्या चौकशीत अमेरिका मदत करणार एअर इंडिया बोईंग ७८७ विमान अपघाताच्या चौकशीत आता यूएस नॅशनल ट्रान्सपोर्टेशन सेफ्टी बोर्ड (NTSB) देखील सामील होईल. NTSB ने त्यांच्या अधिकृत ट्विटमध्ये माहिती दिली आहे की ते तज्ञांची एक टीम भारतात पाठवत आहे, जी भारताच्या एअरक्राफ्ट अॅक्सिडेंट इन्व्हेस्टिगेशन ब्युरो (AAIB) सोबत या अपघाताच्या चौकशीत सहकार्य करेल. 

 अपघातात मृत्युमुखी पडलेल्यांच्या कुटुंबियांना १ कोटी रुपयांची आर्थिक मदत

 टाटा ग्रुपने अपघातात मृत्युमुखी पडलेल्यांच्या कुटुंबियांना १ कोटी रुपयांची आर्थिक मदत देण्याची घोषणा केली आहे. याशिवाय, टाटा ग्रुप अपघातात जखमी झालेल्यांना पूर्ण उपचार देईल आणि त्यांना आवश्यक ती सर्व मदत पुरवेल. तसेच, बी.जे. मेडिकल कॉलेजच्या वसतिगृहाच्या बांधकामातही मदत करेल, असे टाटा ग्रुपने म्हटले आहे.