आंधळी : आंधळी येथील  जि. प. प्राथमिक शाळेत ‘बाल आनंद बाजार’ उत्साहात पार पडला. यावेळी २५ स्टॉल मधून विद्यार्थ्यांनी ७  हजार रुपयांच्या साहित्याची विक्री केली. शालेय जीवनापासून विद्यार्थ्यांना व्यावहारिक ज्ञानाचे धडे मिळावेत. यासाठी येथील प्राथमिक शाळेत ‘बाल आनंद बाजार’ या उपक्रमाचे आयोजन केले होते. शालेय व्यवस्थापन समितीचे अध्यक्ष बापूराव काळे, सरपंच दादासाहेब काळे  ग्रा. सदस्य अतुल खरात,  प्रकाश वलेकर, पोलीस पाटील विशाल गुरव, संतोष काळे यांच्या हस्ते उपक्रमाचे उद्‌घाटन करण्यात आले. 
    यावेळी मुलांनी परिसरात पिकत असलेला भाजीपाला, स्टेशनरी वस्तू, खाऊची दुकाने, हॉटेल, गेम्सचे स्टॉल, विविध प्रकारची फुलझाडे, फळांची दुकाने मांडली होती. या आनंदी बाजारातून विद्यार्थ्यांची ७ हजार हून अधिक रुपयांची उलाढाल झाली. कार्यक्रम यशस्वी होण्यासाठी शाळेचे मुख्याध्यापक घनश्याम काळे व सर्व शिक्षक, शिक्षिका यांनी मेहनत घेतली.