सातारा : सातारा जिल्हा पोलिस दलातील आर्थिक गुन्हे शाखेत कार्यरत पोलीस उपनिरीक्षक (PSI) रऊफ सय्यदकरीम इनामदार यांना भारत सरकारच्या केंद्रीय गृह मंत्रालयाकडून उत्कृष्ट सेवापदक जाहीर झाले आहे. स्वातंत्र्यदिनाच्या पार्श्वभूमीवर जाहीर झालेल्या या सन्मानामुळे सातारा पोलिस दलाच्या शिरपेचात आणखी एक मानाचा तुरा खोवला गेला आहे.

भारत सरकारच्या गृह मंत्रालयाकडून १५ ऑगस्ट २०२६ रोजी स्वातंत्र्यदिनानिमित्त देशभरातील पोलीस दलातील अधिकारी व अंमलदारांना उत्कृष्ट सेवापदक तसेच अतिउत्कृष्ट सेवापदक जाहीर करण्यात आले. यामध्ये सातारा जिल्ह्यातील अधिकारी व अंमलदारांचाही समावेश आहे.

सातारा आर्थिक गुन्हे शाखेत पोलीस उपनिरीक्षक म्हणून कार्यरत असलेल्या रऊफ सय्यदकरीम इनामदार यांच्या दीर्घकालीन, निष्ठावान आणि निष्कलंक सेवेसाठी त्यांची उत्कृष्ट सेवापदकासाठी निवड करण्यात आली आहे. पोलिस सेवेत प्रामाणिकपणे बजावलेल्या कर्तव्याची केंद्रीय गृह मंत्रालयाने घेतलेली दखल म्हणून या सन्मानाकडे पाहिले जात आहे.

सातारा जिल्ह्यातील एकूण १० अधिकारी-अंमलदारांना अतिउत्कृष्ट सेवापदक, तर १६ अधिकारी-अंमलदारांना उत्कृष्ट सेवापदक जाहीर झाले आहेत. त्यामुळे सातारा जिल्हा पोलिस दलाच्या कामगिरीचा राष्ट्रीय स्तरावर गौरव झाला आहे.

पोलीस अधीक्षक निखील पिंगळे आणि अपर पोलीस अधीक्षक डॉ. वैशाली कडुकर यांनी पदकासाठी निवड झालेल्या सर्व अधिकारी-अंमलदारांचे अभिनंदन केले आहे.

आर्थिक गुन्हे शाखेसारख्या संवेदनशील विभागात कार्यरत असताना दीर्घकाळ प्रामाणिकपणे सेवा बजावणाऱ्या PSI रऊफ इनामदार यांच्या कार्याची केंद्र सरकारने दखल घेतल्याने हा सन्मान त्यांच्या सेवेला मिळालेली महत्त्वपूर्ण पावती मानली जात आहे. त्यांच्या या यशाबद्दल पोलिस दलातून तसेच विविध स्तरांतून अभिनंदनाचा वर्षाव होत आहे.