सातारा   : सातारा  जिल्हा बॅंकेच्या वार्षिक सर्वसाधारण सभेत आपला जुना वाद विसरत माजी सभापती रामराजे नाईक निंबाळकर व खा. उदयनराजे भोसले एकमेकांच्या शेजारी बसून हास्यविनोदात रमले होते. त्यामुळे काहींचे चेहरे पडले होते तर अनेकांच्या भुवया उंचावल्या गेल्या, फलटण आणि सातारच्या राजांमध्ये दिलजमाई कधी झाली, असा प्रश्न सर्वांच्या चेहऱ्यावर जाणवत होता
सातारा जिल्ह्यात आज राष्ट्रवादीचे अध्यक्ष खासदार शरद पवार यांची दहिवडीत सभा होत. कोल्हापूरकडे जाताना श्री. पवार यांनी माण तालुक्यातील दुष्काळी जनतेची विचारपूस करण्याच्या निमित्ताने कार्यकर्त्यांशी संवाद साधला. यावेळी त्यांनी भाजपसह महायुतीतील बीजेपी घटक पक्षांतील नेत्यांवर टीकेची झोड उठवली.

यावेळी पत्रकारांशी बोलताना आमदार शशिकांत शिंदेंनी रामराजे नाईक निंबाळकर व खासदार रणजितसिंह निंबाळकर यांना डिवचले.परिवर्तनाची सुरवात फलटणमधून होणार असल्याचे सांगत त्यांनी दोन्ही निंबाळकरांना आव्हान दिले. याची चर्चा सुरु असतानाच आज दुपारी सातारा जिल्हा बॅंकेची वार्षिक सर्वसाधारण सभा झाली. या सभेत व्यासपीठावर ज्येष्ठ संचालक रामराजे नाईक निंबाळकर व खासदार उदयनराजे भोसले हे दोघे एकमेकांच्या शेजारी बसून हास्यविनोदात रमले होते. त्यामुळे अनेकंच्या भुवया उंचावल्या गेल्या.

या दोघांतील वाद आणि त्यातून त्यांनी एकमेकांना शासकिय विश्रामगृहात दिलेले आव्हान संपूर्ण जिल्ह्याला माहित आहे. पण, आता हा वाद मिटला असून या दोघांत दिलजमाई झाली हेच यातून सर्वांना जाणवले. यातून आगामी राजकारणात जिल्ह्यात कोणते फुल उमलणार याची उत्सुकता सातारकरांना आहे.