सातारा : गणेशोत्सव व ईद सणाच्या पार्श्वभूमीवर शांतता समितीची बैठक सुरु असतानाच हिंदूत्ववादी संघटनांच्या आंदोलनाचा मुद्दा पुढे आला. यावर बैठकीतच तणावाचे वातावरण निर्माण झाले. वेळीच पोलिसांनी हस्तक्षेप करत अमोल तांगडे व नरेंद्र पाटील यांना बैठकीतून बाहेर नेल्याने हा तणाव निवळला. दरम्यान, जिल्ह्यातील सर्व सार्वजनिक गणेश मंडळांनी प्रशासनाच्या सूचनांचे काटेकोर पालन करावे. तसेच प्रशासनास सहकार्य करून गणेशोत्सव व ईद सण शांततेत व सौहार्दपूर्ण वातावरणात पार पाडावा, असे आवाहन जिल्हाधिकारी जितेंद्र डूडी यांनी केले. येथील पोलीस करमणूक केंद्रातील अलंकार सभागृहात सार्वजनिक गणेश मंडळाचे पदाधिकारी, मुस्लीम व प्रशासकीय अधिकारी यांची शांतता समितीची बैठक झाली. बैठकीला जिल्हाधिकारी डूडी, पोलीस अधीक्षक समीर शेख, प्रांताधिकारी सुधाकर भोसले, साताऱ्याचे उपविभागीय पोलीस अधिकारी किरण सूर्यवंशी यांच्यासह पोलीस दलातील अधिकारी, संबंधित विभागांचे अधिकारी, मंडळांचे पदाधिकारी, मुस्लिम बांधव उपस्थित होते. बैठकीत सामाजिक, राजकीय कार्यकर्तेही सहभागी होते. यावेळी स्वातंत्र्य दिनी इन्स्टाग्रामवर समाजविघातक पोस्ट केल्याच्या विरोधात हिंदूत्ववादी संघटनांनी जिल्हाधिकारी कार्यालयावर निषेध मोर्चा काढला होता, त्या मुद्दयावर नरेंद्र पाटील यांनी ३५ वर्षात जिल्हाधिकारी कार्यालयात आंदोलन आत गेले नव्हते. पण, त्यावेळी जिल्हाधिकारी कार्यालयासमोर पोलीस बंदोबस्त त्यावेळी नव्हता. पोलीस बंदोबस्त पालकमंत्र्यांच्या घरासमोर लावला जातो, असे सांगितल्याने अमोल तांगडे संतप्त झाले. गणेशोत्सव, ईद सणाच्या पार्श्वभूमीवर ही बैठक आहे, इतर विषय काढून बैठक भरकटवू नये, असे सुनावले. यामुळे बैठकीत तणाव निर्माण झाला. यावेळी सातारा तालुका पोलीस ठाण्याचे पोलीस निरीक्षक विश्वजित घोडके यांनी तांगडे यांना बैठकीतून बाहेर नेले. त्यानंतर नरेंद्र पाटील यांनाही बैठकीतून बाहेर नेले. तेथे दोघांना समजवल्यानंतर पुन्हा बैठकीत बसण्यासाठी नेण्यात आले. त्यानंतर बैठक सुरळीत सुरु झाली.