माण  : माण तालुका पंचायत समितीच्या इमारतीला गळती लागली असून ती इमारत पडण्याच्या मार्गावर आहे. त्याचबरोबर सदर इमारतीची वैधता देखील संपून गेली असल्याने ती नादुरुस्त इमारत कधीही कोसळून मोठा धोका निर्माण होण्याची शक्यता नाकारता येत नाही.परंतु संबंधित अधिकारी आणि पंचायत समितीच्या बांधकाम विभागाच्या  कामचुकारपणामुळेच पंचायत समितीमध्ये कामानिमित्त येणाऱ्या नागरिकांच्या व कर्मचाऱ्यांसह तिथं असलेल्या संबंधित अधिकाऱ्यांच्या जीविताला धोका निर्माण झाला असल्याचा आरोप नागरिकांतून होत आहे.माण तालुका पंचायत समितीच्या प्रशासकीय कार्यशैलीवर आधीच नागरिकांचा आक्षेप असतानाच सदर इमारतीची झालेली दुर्दशा पाहता तिथे आपल्या कामानिमित्त येणाऱ्या नागरिकांना तर सर्व काही दिसत आहे परंतु हे प्रशासनाच्या अजूनही का लक्षात आले नाही ? सदर इमारतीची दुरुस्ती अजूनही का झाली नाही? संबंधित प्रशासकीय अधिकाऱ्यांच्या डोळ्यांना हे दिसत नाही का? माण पंचायत समितीचा बांधकाम विभाग काय करत आहे, असे सवाल जनतेच्या माध्यमातून उमटताना दिसत आहेत.सदर गोष्टीची दखल घेऊन इमारतीच्या दुरुस्तीची तजवीज माण पंचायत समितीचे बांधकाम विभाग करणार की इमारत कोसळून एखाद्याला जखमी होण्याची किंवा जीव गमावण्याची वेळ येण्याची वाट पाहणार हे पाहणे आता उत्सुकतेचे ठरणार आहे.