सातारा : साताऱ्याचे राष्ट्रवादी काँग्रेसचे आमदार शशिकांत शिंदे यांचे बंधु ऋषिकेश शिंदे यांनी काल मुख्यमंत्री एकनाथ शिंदे यांच्या शिवसेनेत प्रवेश केला. या घटनेनंतर सातारा जिल्ह्यात एकच खळबळ उडाली. याबाबत एका वृत्तमाध्यमाने शिंदे गटाचे आमदार महेश शिंदे यांच्याशी संपर्क साधला आता त्यांनी याबाबत प्रतिक्रिया दिली. "आमदार शशिकांत शिंदे यांचे भाऊ ऋषिकांत शिंदेंनी काल पक्षात प्रवेश केला. आ. शिंदे यांच्यासोबत त्यांच्या घरातीलही कोणी जाणार नाहीत. शेवटी कोण किती काम करतंय हे पाहिलं जात," असे सांगत महेश शिंदे यांनी शशिकांत शिंदेंवर निशाणा साधला.
   मुंबईत मुख्यमंत्र्यांच्या वर्षा या निवासस्थानी काल ऋषीकेश शिंदे यांच्यासोबत काही कार्यकर्त्यांनी शिवसेनेत पक्ष प्रवेश केला. ऋषिकांत शिंदेंच्या पक्षप्रवेशाबाबत आमदार महेश शिंदे यांनी मोजक्याच शब्दात प्रतिक्रिया दिली. ते म्हणाले की, सातारा जिल्ह्यात शिंदे गटाच्या माध्यमातून पक्ष बळकट करण्यासाठी प्रयत्न सुरु आहेत. पक्षात कोणाला घ्यायचे याबाबत मुख्यमंत्री स्वतः निर्णय घेतात. ते जे आदेश करतात त्याचे आम्ही पालन करतो. आम्ही आमदार असल्यामुळे आमच्या तालुका पुरताच विचार करतो. शेवटी मुख्यमंत्री शिंदे जो काय तो निर्णय घेतात.