नागठाणे : रविवारी दुपारी देशमुखनगर ते खोजेवाडी (ता.सातारा) दरम्यान अँटलांटा पट्रोल पंपाजवळ मारुती ओम्नी व स्विफ्ट कार यांच्यात झालेल्या भीषण अपघातातील गंभीर जखमी झालेल्या यशवंत दिनकर धुमाळ (वय.५८,रा.कल्याण पार्क अपार्टमेंट, फॉरेस्ट कॉलनी,विलासपूर,सातारा) यांचा रात्री उशिरा उपचार सुरू असताना मृत्यू झाला.ते संभाजीनगर ग्रामपंचायतीत ग्रामविकास अधिकारी म्हणून कार्यरत होते.
        रविवारी  देशमुखनगर येथील मंगल कार्यालयात एक कार्यक्रम होता.या कार्यक्रमाला यशवंत धुमाळ हे पत्नी सिंधू धुमाळ व मुलगा कार्तिक यांच्यासह त्यांच्या मारुती ओम्नी व्हॅनने आले होते.कार्यक्रम आटोपल्यानंतर दुपारी ते परत सातारा येथे निघाले होते.त्यांची व्हॅन देशमुखनगर ते खोजेवाडी दरम्यान असलेल्या अँटलांटा पेट्रोल पंपाजवळ आली असता पुढून भरधाव वेगाने आलेल्या स्विफ्ट कारने जोरदार धडक दिली.
       अपघात इतका भीषण होता की दोन्ही गाड्यांचा चक्काचूर झाला होता.या अपघातात यशवंत दिनकर धुमाळ, सिंधू यशवंत धुमाळ, कार्तीक यशवंत धुमाळ (रा. सातारा) व स्विफ्ट कारमधील शिवनाथ साळुंखे, अमोल साळुंखे (रा. नागठाणे.ता.सातारा), प्रतीक्षा कृष्णत घाडगे (रा. फत्यापूर,ता.सातारा) हे जखमी झाले होते.या सर्व जखमींना ग्रामस्थांनी तात्काळ उपचारासाठी सातारा येथे पाठवले होते.त्यापैकी यशवंत धुमाळ व त्यांच्या पत्नी सिंधू धुमाळ गंभीर जखमी झाले होते.त्यांच्यावर सातारा येथील खाजगी रुग्णालयात उपचार सुरू होते.
        रविवारी रात्री उशिरा उपचार सुरू असताना यशवंत धुमाळ यांचा मृत्यू झाला.या अपघाताची बोरगाव पोलीस ठाण्यात नोंद झाली असून पोलिसांनी स्विफ्ट कारचालक शिवनाथ परशुराम साळुंखे (रा.नागठाणे, ता.सातारा) याच्याविरुद्ध गुन्हा दाखल केला आहे.पुढील तपास अपघात विभागाचे हवालदार विजय देसाई व प्रकाश वाघ करत आहेत