सातारा - सर्वोच्च न्यायालयाच्या निकालानुसार सातारा पालिका निवडणुकीसाठी इतर मागास प्रवर्गासाठी १३ जागा आरक्षित करण्यात आल्या. या जागा आरक्षित झाल्याचा फटका साताऱ्यातील दिग्गजांना बसल्याचे दिसते.
इतर मागास प्रवर्गासाठीची आरक्षण सोडत आज साताऱ्यातील शाहू कलामंदिरात प्रांताधिकारी मिनाज मुल्ला यांच्या अध्यक्षतेखाली पार पडली. या वेळी मुख्याधिकारी अभिजित बापट, सहायक मुख्याधिकारी पराग कोडगुले व इतर अधिकारी, कर्मचारी उपस्थित होते. सुरुवातीस श्री. बापट यांनी सोडतीची माहिती देत प्रभाग रचनेनुसार इतर मागास प्रवर्ग महिलेसाठी ‘अ’ गट, तर ‘ब’ गट इतर मागास प्रवर्गाच्या सर्वसाधारण गटासाठी राहणार असल्याचे सांगितले.
यापूर्वी अनुसूचित जाती, जमातीसाठीचे आरक्षण जाहीर झाले असल्याने १, २, ३, ४, ८, १३, १५ हे सात प्रभाग सोडून १८ प्रभाग इतर मागास प्रवर्गाच्या आरक्षणासाठी निवडण्यात आले. यासाठीच्या चिठ्ठ्या सोडतीसाठी ड्रममध्ये टाकण्यात आल्या. त्यापैकी १३ चिठ्ठ्या शालेय विद्यार्थ्यांनी काढल्या. त्यामध्ये प्रभाग क्रमांक २१, २४, ६, १८, १०,१६, २५, १२, १९, ११, ५, २२, २० यांचा समावेश होता. या १३ प्रभागांच्या चिठ्ठ्यांपैकी ७ चिठ्ठ्यांच्या आधारे इतर मागास प्रवर्गातील महिलेच्या जागेसाठी आरक्षण सोडत झाली. या चिठ्ठ्यांच्या आधारे १०, ५, २२, १८, १६, ११, २१ या प्रभागातील ‘अ’ गट इतर मागास प्रवर्गातील महिलांसाठी राखीव झाल्याचे जाहीर झाले. त्यानंतर इतर मागास प्रवर्गातील सर्वसाधारण गटासाठी १२, २५, १९, २४, २०, ६ या प्रभागातील ‘ब’ जागा आरक्षित झाल्या. अनुसूचित जाती, जमाती, इतर मागास प्रवर्गासाठीची आरक्षण निश्चिती पूर्ण झाल्यानंतर ७, २३, ९, १७, १४ हे प्रभाग पूर्णपणे खुले राहिल्याचे समोर आले.
प्रकाश शिंदे 
