पुसेसावळी : अखिल भारतीय परीट सेवा समाज मंडळाच्या वतीने कराड येथील सामाजिक कार्यकर्ते प्रकाश जाधव (मेहरबान) यांना नुकताच परिट समाजाचा राष्ट्रीय पातळीवरचा पुरस्कार देण्यात आला. त्यानिमित्ताने कृष्णा सहकारी साखर कारखान्याचे संचालक बबनराव शिंदे यांच्या हस्ते आज त्यांचा परिट समाजाच्या वतीने सन्मान सोहळा आयोजित करण्यात आला होता. याप्रसंगी प्रकाश जाधव भावुक झालेले पहायला मिळाले.  
   यावेळी बोलताना प्रकाश जाधव म्हणाले, परीट समाज बांधव आणि मित्रपरिवाराने केलेला हा माझा सन्मान पाहून मी भारावून गेलो आहे. हा सन्मान माझ्या एकट्याचा नसून आपणा सर्व समाज बांधवांचा आहे असे मी मानतो. यापुढेही जास्तीत जास्त सामाजिक कार्य करण्याचे माझे प्रामाणिक प्रयत्न सुरूच राहतील अशी ग्वाही देतो.
  कृष्णा सहकारी साखर कारखान्याचे विद्यमान संचालक बबनराव शिंदे म्हणाले परीट समाजातील प्रकाश जाधव यांच्यासारख्या व्यक्तीने केलेल्या सामाजिक कार्याची दखल घेतली गेली आहे.आणि त्यांना राष्ट्रीय पुरस्कार मिळाला ही परीट समाजाच्या दृष्टीने अभिमानाची बाब आहे. संत गाडगेबाबा यांच्या तत्त्वाने त्यांचे कार्य चालूच आहे. ही बाब देखील आदर्शवत आहे यावेळी मान्यवरांच्या हस्ते प्रकाश जाधव यांना सन्मानपत्र, संत गाडगेबाबांची मूर्ती, शाल, श्रीफळ आणि पुष्पगुच्छ देऊन त्यांचा सत्कार करण्यात आला.
  कार्यक्रमाचे सूत्रसंचालन व प्रास्ताविक सुनील परीट यांनी केले उपस्थित मान्यवरांचे स्वागत महेश सुळे,अजित गायकवाड, गणेश जाधव यांनी केले. केदार रसाळ यांनी आभार मानले. यावेळी पेरले गावचे आदर्श पोलीस पाटील प्रवीण राक्षे,उत्तम राऊत तांबवे, खंडू इंगळे, दिगंबर यादव, अजित गायकवाड, अण्णा वाघ, अजिंक्य राऊत, दिलीप नलवडे यांच्यासह प्रकाश जाधव यांचा मित्रपरिवार मान्यवर व परीट समाज बांधव मोठ्या संख्येने उपस्थित होते.