दहिवडी : राज्यात नावलौकिक असलेल्या महाराष्ट्र राज्य मार्ग परिवहन महामंडळाच्या ७५ व्या वर्धापन दिनानिमित्त माण खटावचे आमदार जयकुमार गोरे यांनी दहिवडी बस स्थानकाला सदिच्छा भेट देत परिसराची पाहणी केली.यावेळी आमदार गोरे यांनी बस स्थानकाच्या कामाची इत्यंभूत माहिती जाणून घेत केलेल्या कामाचे कौतुक केले. यावेळी आगार व्यवस्थापक कुलदीप डुबल,नगरसेवक रुपेश मोरे,प्रवीण पाटील,प्रल्हाद कबाडे,बाबुराव खाडे यांच्यासह पर्यावरण विभागाचे कर्मचारी उपस्थित होते.

दरम्यान वर्धापन दिनानिमित्त त्यांनी प्रवाशांना पेढे व गुलाब पुष्प देऊन प्रवाशांचे स्वागत केले. गेली ७५ वर्षे अविरत धावणारी लाल परी प्रवाशांच्या सेवेत दाखल झाल्यापासूनच चर्चेत असल्याचे पहावयास मिळत आहे. त्यात गेल्या काही महिन्यांपासून महिला व ज्येष्ठांना महामंडळाने बस तिकिटात सवलत दिल्याने डबघाईला आलेले महामंडळ पुन्हा सुरळीत होत आहे. विद्यार्थी पास तसेच पुण्यश्लोक अहिल्यादेवी होळकर विद्यार्थी पासाच्या माध्यमातून परिवहन महामंडळाने विद्यार्थ्यांना सवलती मिळवून दिल्याने एसटीकडे विद्यार्थी महिला तसेच वयोवृद्धांचा कल वाढू लागला आहे.

गेल्या सहा महिन्यापूर्वी कराड येथून दहिवडीत हजर झालेले आगार व्यवस्थापक कुलदीप डुबल यांनी बस स्थानकाच्या कायापालटासाठी झपाटा लावून अल्पावधीतच बस स्थानकाचा चेहरा मोहरा बदलत बसस्थानक जिल्ह्यात नव्हे तर राज्याच्या शर्यतीत आणल्याची चर्चा जिल्हाभर रंगू लागली आहे. गेल्या काही दिवसांपासून स्वर्गीय हिंदुॠदय सम्राट बाळासाहेब ठाकरे स्वच्छ सुंदर बस स्थानक अभियान संपूर्ण राज्यात सुरू होते.यात दहिवडी आगाराने सहभाग घेत 'अ'वर्ग बस स्थानकात जवळपास दहा लाख रुपये लोकसहभागातून जमा करत राज्याच्या शर्यतीत दहिवडी बस स्थानक आल्याने दहिवडी आगाराची चर्चा राज्यात रंगली होती.