गोंवले बु : ता.माण या ठिकाणी आरोग्याच्या प्रश्न ग्रामप्रशासनाचे दुर्लक्ष असल्याचे पाहायला मिळत आहे कारण गावागावात असलेल्या उघड्या गटारांच्या माध्यमातून सांडपाण्यातून निर्माण झालेल्या डासांच्या फैलावाने गावात दाट रोगराई पसरण्याची शक्यता व रोगराईचा फटका लहान मुलांना बसण्याची शक्यता ही निर्माण झाली आहे. त्यामुळे आरोग्य प्रश्नी कोमात असलेले ग्रामप्रशासन जागे होऊन जोमात असलेल्या रोगराईला थोपवण्यात यशस्वी होणार का ? हे पाहणे महत्वपूर्ण ठरणार आहे.माण तालुक्यासह सर्वत्र पावसाची मुसळधार नसली तरी रिपरिप सुरू आहे. त्यामुळे गावागावात साठलेल्या गटारातील सांडपाण्यातून निर्माण झालेल्या डासांच्या फैलावाने रोगराई पसरण्याची दाट शक्यता निर्माण झाली आहे. सातारा पंढरपूर रोडवर असलेल्या गोंदवले नगरीतील असणारी गटारे सताड उघडी पडलेली आहेत त्यामुळे गटाराच्या माध्यमातून वाहून जाणारे सांडपाणी आणि त्यातून निर्माण होणाऱ्या डासांच्या फैलावाने साथीच्या आजारांना निमंत्रण मिळत आहे त्यामुळे या आजारांना बळी पडण्याची वेळ गावातील नागरिकांवर आलेली आहे.त्याचबरोबर मुख्य रस्त्यालाही अर्धवट कामामुळे गटाराचेच स्वरूप प्राप्त झाल्याचे दिसत आहे. मुख्य रस्ता असल्याने रस्त्यावर असणारी वाहनांची रहदारी आणि वरून पडणाऱ्या पावसाच्या सततच्या रिपरिपीमुळे साठलेल्या पाण्यातून देखील डासांची उत्पत्ती होत असून या डासांच्या माध्यमातून कावीळ, मलेरिया, डेंग्यूसारख्या आजारांना आयतेच आमंत्रण मिळत आहे.या सर्व गोष्टीकडे दुर्लक्ष करणारे ग्रामप्रशासन आता तरी या बाबीकडे लक्ष देत गटारांची दुरुस्ती करून सांडपाण्याची योग्य विल्हेवाट लावून साथीच्या रोगांपासून गावाला वाचवणार का ? गावात साथीचे रोग निवारणात्मक औषध फवारणी करणार का? हा सवाल गावकरी करत आहेत.
एकनाथ वाघमोडे
