फलटण : छत्रपती शिवाजी महाराज जन्मोत्सव समिती फलटण तालुका यांच्यावतीने परंपरागत अक्षय तृतीयेच्या तिथीनुसार शिवजयंती उत्सवात दुचाकी रॅलीच्या प्रारंभाने मोठ्या उत्साहाने सुरुवात झाली. 

माजी जिल्हा परिषद अध्यक्ष श्रीमंत संजीव राजे नाईक निंबाळकर यांच्या हस्ते मालोजीराजे नाईक निंबाळकर स्मारक शंभूतीर्थ फलटण येथून श्रीफळ वाढवून आणि धर्मवीर संभाजीराजे यांच्या पुतळ्यास पुष्पहार अर्पण करून अभिवादन करण्यात आले आणि या भव्य दुचाकी रॅलीला सुरुवात झाली. 

फलटण शहर व तालुक्यातील बहुसंख्य युवावर्ग या दुचाकी रॅलीमध्ये सहभागी होऊन पारंपारिक वेश धारण करून अत्यंत योग्य व सूक्ष्म नियोजन करून छत्रपती शिवाजी महाराज चौकातील शिवतीर्थ फलटण येथे शिवरायांना पुष्पहार अर्पण करून अभिवादन करून या रॅलीची सांगता शंभू तीर्थ येथे झाली. या दुचाकी रॅलीमध्ये शहरातील युवावर्ग सर्व शिवप्रेमी व सर्व आबालवृद्ध मोठ्या उत्साहाने सहभागी झाले होते पारंपारिक वेशभूषेतील लहान मुले सर्वांचे लक्ष वेधून घेत होते. 

छत्रपती शिवाजी महाराज जन्मोत्सव समितीच्या सर्व कार्यकर्त्यांनी अतिशय शिस्तबद्ध नियोजन करून शांततेत आणि शिवरायांच्या पवित्र स्मृतीस उजाळा देत छत्रपतींचा जयजयकार करत ही दुचाकी रॅली मोठ्या उत्साहात संपन्न झाली.