दहिवडी :माण तालुक्यातील शेवटचे टोक असणाऱ्या कारखेल ग्रामपंचायतच्या सरपंच पदी शशिकांत गायकवाड व उपसरपंच पदी विश्वनाथ गेजगे यांची बिनविरोध निवड झाली.
याबाबत अधिक माहिती अशी की,कारखेल ग्रामपंचायत मध्ये मावळत्या सरपंचांनी पदाचा राजीनामा दिल्याने रिक्त झालेल्या पदासाठी निवडी घेण्यात आल्या.या निवडीसाठी घेण्यात आलेल्या बैठकीसाठी नऊपैकी आठ ग्रामपंचायत सदस्य उपस्थित होते.
यावेळी शशिकांत गायकवाड यांची सरपंच पदी तर विश्वनाथ गेजगे यांची उपसरपंच पदी एकमताने निवड करण्यात आली.निवडीनंतर नवनिर्वाचित पदाधिकाऱ्यांचा सत्कार व गावातून मिरवणूक काढून फटाक्यांच्या आतषबाजीसह जल्लोष करण्यात आला. सरपंच म्हणून काम करण्याचा प्रदीर्घ अनुभव असणारे शशिकांत गायकवाड यांची पुन्हा एकदा सरपंच पदी निवड झाली.
निवडीनंतर शशिकांत गायकवाड यांनी गावाच्या विकासासाठी कायम कार्यरत राहणार असून शासनाच्या जास्तीत जास्त योजना गावात राबवण्यात येतील असेही त्यांनी सांगितले.
शशिकांत गायकवाड हे माण खटाव चे आमदार जयकुमार गोरे यांचे विश्वासू म्हणून ओळखले जातात. या बैठकीस सर्व ग्रामपंचायत सदस्य ग्रामस्थ मोठ्या संख्येने उपस्थित होते. सर्व नवनिर्वाचित पदाधिकाऱ्यांचे आमदार जयकुमार गोरे,अरुण गोरे,सुनील गायकवाड,गोपाळ गायकवाड,रवींद्र गायकवाड,शहाजी गायकवाड,नाना गायकवाड यांनी अभिनंदन केले.
धिरेनकुमार भोसले
