सातारा : दुर्गम भागात शेती आणि व्यवसायासाठी अनेक अडचणी येत असतात. दुर्गम भागातील लोकांचे जीवनमान उंचवायचे असेल तर या भागातील मुले उच्चशिक्षित झाली पाहिजेत. दुर्गम आणि डोंगरी भागातील विध्यार्थ्यानी शिक्षणाला प्राधान्य देऊन स्वतःचे आणि गावाचे नाव उज्वल करावे, असे आवाहन आ. श्रीमंत छ. शिवेंद्रसिंहराजे भोसले यांनी केले. 
                  आदर्श माध्यमिक विद्यालय, पेटेश्वरनगर येथे विविध शाळातील विध्यार्थ्यांना आ. शिवेंद्रसिंहराजेंच्या वतीने दीडशे रेनकोट आणि प्रभो शिवाजी राजा प्रतिष्ठान व कास पठार विकास प्रतिष्ठानच्या वतीने शंभर गणवेश वाटप समारंभप्रसंगी ते बोलत होते. यावेळी जिल्हा परिषदेचे माजी सदस्य राजू भोसले, सातारा तालुका पोलीस ठाण्याचे पोलीस निरीक्षक घोडके, आष्टे विकास सेवा सोसायटीचे चेअरमन रविंद्र गायकवाड,  पेट्री जिल्हा परिषद शाळेचे केंद्रप्रमुख सातपुते, पंचायत समितीचे माजी सदस्य अजय काशीद, संपत जाधव, सामाजिक कार्यकर्ते गोविंद बादापुरे, रामचंद्र उंबरकर, अरुण शेडगे, अंकुश मोरे, शंकर जांभळे, श्रीरंग आहिरे, पांडुरंग शेडगे, महादेव अहिरे, सखाराम शिंदे, एल. डी. गोगावले, मुख्याध्यापक साखरे, विविध गावचे सरपंच, ग्रामस्थ, शिक्षक आणि विद्यार्थी बहुसंख्येने उपस्थित होते. 
              प्रभो शिवाजीराजा प्रतिष्ठानच्या आणि कास पठार विकास प्रतिष्ठानच्या माध्यमातून सांबरवाडी, यवतेश्वर, आनावळे, जांभळमुरे, अनावळेवाडी, पिसानी, पेट्री बंगला, पेट्री गाव, अंबानी, पारंबे, अटाळी, कासानी, घाटवन, एकीव  या जिल्हा परिषद शाळेतील विद्यार्थ्यांना व आदर्श माध्यमिक विद्यालय पेटेश्वरनगर पेटवली बंगला या हायस्कूलमधील विद्यार्थ्यांना आ. शिवेंद्रसिंहराजे  यांच्या कुटुंबियांच्या वतीने दीडशे रेनकोट देण्यात आले. तसेच प्रतिष्ठानच्यावतीने शंभर गणवेश वाटप करण्यात आले. स्वतःसाठी तर सगळे जगतात. थोडं दुसऱ्यासाठी जगा या उक्तीप्रमाणे जी मंडळी  कास पठार भागातील शाळेत शिकली त्यानंतर आपल्या उदरनिर्वाहासाठी मुंबईला स्थायिक झाली पण, कर्मभूमी मुंबई असली तरी आपली मायभूमी आणि सामाजिक जबाबदारी विसरली नाहीत. आपण ज्या ठिकाणी लहानाचं मोठं झालो, ज्या शाळेत शिकलो, त्या शाळेतील विद्यार्थ्यांना गणवेश आदी शालेय साहित्याचे वाटप  होत आहे. प्रतिष्टान आणि येथील ग्रामस्थांनी सामाजिक बांधिलकी जोपासली असून ती आणखी वृद्धिंगत व्हावी, असे आ. शिवेंद्रसिंहराजे यावेळी म्हणाले. सोमनाथ जाधव यांनी सूत्रसंचालन केले तर लक्ष्मण गोगावले यांनी आभार मानले