सातारा : "या पुस्तकातील गोष्टी सामान्य माणसांच्या बखरी या काळातील सामान्य माणसांच्या विचारांचे पैलू अभ्यासण्यासाठी पुढील काळात अभ्यासक संदर्भ म्हणून वापरतील" असे प्रतिपादन प्रकाशयात्री स्वागत थोरात यांनी केले.
अॅड डॉ सुचित्रा घोगरे-काटकर लिखित एक पाऊल सकारात्मकतेचे या पुस्तकाचे प्रकाशन साताऱ्यात झाले. यावेळी अध्यक्षस्थानी स्वागत थोरात होते. यावेळी प्रमुख पाहुणे म्हणून जेष्ठ विधिज्ञ अॅड डॉ सुधाकर आव्हाड, शब्द शिवार प्रकाशनचे इंद्रजित घुले, संत कुर्मदास कारखान्याचे संचालक दादासाहेब साठे, जेष्ठ पत्रकार श्रीकांत कात्रे उपस्थित होते.
समाजातील सकारात्मक उर्जा शब्द रुपात या पुस्तकात एकत्र झाली असून आजच्या निराशाजनक काळात हे पुस्तक अत्यंत उपयुक्त आहे असे मत यावेळी अॅड. सुधाकर आव्हाड यांनी केले.
एक पाऊल सकारात्मकतेचे या पुस्तकाच्या ५०० प्रती रुरल रिलेशन्स च्या प्रदीप लोखंडे यांनी सुरू केलेल्या ग्रंथालयांसाठी देणगी स्वरुपात देण्यात येणार असल्याचे यावेळी जाहीर करण्यात आले.
कार्यक्रमाचे प्रास्ताविक डॉ महेश शिंदे यांनी केले. पाहुण्यांची ओळख शुभांगी दळवी यांनी तर आभार डॉ ज्योती काटकर यांनी मानले. या कार्यक्रमाचे सूत्रसंचालन सविता कारंजकर यांनी केले. यावेळी कायदा, वैद्यकीय, सामाजिक, शैक्षणिक, कृषी क्षेत्रातील अनेक मान्यवर उपस्थित होते. विविध क्षेत्रातील व्यक्तींनी मोठ्या प्रमाणावर उपस्थित राहून पुस्तक प्रकाशन कार्यक्रमास भरभरून प्रतिसाद दिला.
मुकुंदराज काकडे 
