महाबळेश्वर :महाबळेश्वर पोलीस ठाण्याचे नवे प्रभारी पोलीस निरीक्षक हर्षद गालिंदे यांनी पदभार स्वीकारल्यानंतर पहिल्याच दिवशी कृतीशील नेतृत्वाची झलक दाखवत शहरातील वाहतूक कोंडीचा केंद्रबिंदू असलेल्या वेण्णा लेक परिसरात प्रत्यक्ष जाऊन वाहतूक नियंत्रणाची जबाबदारी सांभाळली.

पर्यटन हंगामामुळे वेण्णा लेक परिसरात मोठ्या प्रमाणावर पर्यटकांची गर्दी होत असून वाहनांच्या लांबच लांब रांगा लागण्याचे प्रकार नेहमीच घडतात. ही परिस्थिती लक्षात घेऊन निरीक्षक गालिंदे यांनी कार्यालयात बसून केवळ सूचना देण्याऐवजी स्वतः घटनास्थळी उपस्थित राहून वाहतूक सुरळीत करण्यासाठी पोलिसांसह नियोजन केले. वाहनचालकांना योग्य मार्गदर्शन करत वाहतुकीचा प्रवाह सुरळीत करण्यासाठी आवश्यक त्या सूचना देण्यात आल्या.

महाबळेश्वर–पाचगणी हे राज्यातील तसेच देशातील महत्त्वाचे पर्यटनस्थळ असल्याने वाहतूक व्यवस्थापन हे पोलीस प्रशासनासमोरील मोठे आव्हान आहे. अशा परिस्थितीत पदभार स्वीकारताच प्रत्यक्ष रस्त्यावर उतरून समस्या समजून घेण्याचा आणि त्यावर तातडीने उपाययोजना करण्याचा प्रयत्न हा सकारात्मक आणि कृतीशील दृष्टिकोन असल्याची चर्चा शहरात सुरू आहे.

वेण्णा लेक परिसरातील वाहतूक काही प्रमाणात सुरळीत झाल्याने स्थानिक नागरिक, व्यापारी आणि पर्यटकांनाही दिलासा मिळाला. अनेकांनी नव्या प्रभारी पोलीस निरीक्षकांच्या या तात्काळ कृतीचे स्वागत करत, वाहतूक शिस्तीसह पर्यटनस्थळावरील इतर समस्यांवरही अशाच प्रकारे प्रभावी कारवाई होईल, अशी अपेक्षा व्यक्त केली.

पर्यटनस्थळाची वाढती गर्दी, पार्किंगची कमतरता आणि वाहतुकीचा वाढता ताण लक्षात घेता, पोलीस प्रशासनाने सातत्याने प्रत्यक्ष मैदानात राहून नियोजन केल्यास महाबळेश्वरमधील वाहतूक व्यवस्थापन अधिक प्रभावी होईल, असा विश्वास स्थानिक नागरिकांनी व्यक्त केला आहे.