सातारा न्युज/ ओमकार सोनावले :  विधानसभा अध्यक्षपदाच्या निवडणुकीत भाजप उमेदवार राहुल नार्वेकर यांनी बाजी मारली आहे. विधिमंडळात आज मतदान प्रक्रिया पार पडली असता राहुल नार्वेकर याना भाजप आणि शिंदे गट यांची एकत्रित मिळून तब्बल 164 मते मिळाली. तर महाविकास आघाडीच्या राजन साळवी याना फक्त 107 मते मिळाली त्यामुळे राहुल नार्वेकर विजयी झाले आहेत.

मतदानावेळी शिंदे गटाने शिवसेनेच्या व्हीपचे पालन न करता आपली सर्व मते राहुल नार्वेकर यांच्या पारड्यात टाकली.तसेच बहुजन विकास आघाडी आणि मनसेने देखील राहुल नार्वेकर याना मतदान केलं. तर समाजवादी पक्षाने तटस्थ भूमिका घेतली. त्यामुळे शिवसेना उमेदवार राजन साळवी यांचा थेट पराभव झाला

राहुल नार्वेकर यांची विधानसभा अध्यक्षपदी निवड झाल्यानं विधानमंडळ अध्यक्षपदी सासरे आणि जावयांचं ‘राज्य’ असणार आहे. विधानसभेत राहुल नार्वेकर तर विधानपरिषदेत त्यांचे सासरे रामराजे नाईक निंबाळकर हे सभापती आहेत. महाराष्ट्राच्या इतक्या वर्षाच्या राजकारणात पहिल्यांदाच विधानसभा अध्यक्ष आणि विधान परिषद सभापती म्हणून जावई आणि सासरे अशी जोडी पाहायला मिळाली आहे.