सातारा : आम आदमी पार्टीचे राष्ट्रीय संयोजक तथा दिल्ली राज्याचे मुख्यमंत्री माननीय अरविंद केजरीवाल यांना सीबीआयने मुद्दाम, त्रास देण्याच्या हेतूने आणि दडपशाही करीत चौकशीसाठी बोलावले. या भ्याड नीतीचा सातारा आम आदमी पक्षाच्यावतीने शहरातील हुतात्मा स्मारक येथे काळ्या फिती लावून निषेध करण्यात आला.
यावेळी पक्षाचे पश्‍चिम महाराष्ट्र खजिनदार सरदार (सागर) भोगांवकर, जिल्हाध्यक्ष शिवाजी जाधव, जिल्हा उपाध्यक्ष महेंद्र बाचल, रतन पाटील, जिल्हा खजिनदार विजयकुमार धोतमल, जिल्हा प्रसिद्धी प्रमुख निवृत्ती शिंदे, जिल्हा सल्लागार सदस्य एडवोकेट मंगेश महामुलकर, जिल्हा सचिव मारुती जानकर, शहराध्यक्ष जयराज मोरे शहर उपाध्यक्ष सादिक शेख आदी पदाधिकारी उपस्थित होते.
आम आदमी पक्षाचे संयोजक अरविंद केजरीवाल यांची 100 कोटींच्या लाचप्रकरणात आतापर्यंत तीनवेळा सीबीआयने चौकशी केली. तसेच त्यांच्या मालमत्तेवर छापेही मारले. मात्र, त्यामध्ये त्यांना आक्षेपार्ह काहीही सापडलेले नाही. मात्र तरीही केवळ त्रास देण्याच्या भावनेतून सीबीआयने केजरीवाल यांना चौकशीसाठी पाचारण केले. याचा निषेध सातार्‍यातील आम आदमी पक्षाच्यावतीने करण्यात आला.
यावेळी बोलताना भोगांवकर म्हणाले, आम आदमी पार्टीचे राष्ट्रीय संयोजक तथा दिल्ली राज्याचे मुख्यमंत्री माननीय अरविंद केजरीवाल यांना दडपशाही करण्याचे हेतूने व दिल्ली व पंजाब या ठिकाणी आम आदमी सरकारचे माध्यमातून होत असलेले लोकहितकारक कारभाराला घाबरून व केजरीवाल तसेच आम आदमी पार्टीची प्रतिमा मलीन करण्याच्या दुष्ट हेतूने केंद्रीय तपास यंत्रणाचा गैरवापर करून दिल्लीत बसलेल्या केंद्र सरकारने एक भ्याड कृत्य करून सीबीआय मार्फत कपोलकल्पित दारू घोटाळा नामक प्रकरणामध्ये चौकशी करणार असल्याचे भासवून केवळ दडपशाही करण्याच्या हेतुने चौकशी कामी दिनांक 16 रोजी हजर राहण्याचे कळविलेले होते. ही बाब लोकशाही कडून हुकूमशाही कडे जाणारी असल्याची भावना सबंध देशात असल्याने या कारवाईचे निषेधार्थ आम आदमी पार्टी सातारा जिल्ह्याचे वतीने मौन आंदोलन हुतात्मा स्मारक परिसरात करण्यात आले.