सातारा- शहर व परिसरामध्ये गेली सात वर्षांपासून साऊंड सिस्टीम (डॉल्बी) वाजवणेस स्थानिक प्रशासनाने परवानगी नाकारलेली आहे. सातारा शहर वगळता सातारा जिल्ह्यातील इतर शहरांमध्ये साऊंड सिस्टीम (डॉल्बी) वाजवणेस परवानगी दिली गेली आहे. या दुजाभावामुळे सातारा शहर व परिसरातील साऊंड, लाईट, जनरेटर व्यावसायिकांवर आणि त्यांच्या कुटुंबियांवर उपासमारीची वेळ आलेली आहे. सुप्रीम कोर्टाच्या निर्देशानुसार शासनाच्या अटी व निकषानुसार साऊंड, लाईट आणि जनरेटर या व्यावसायिकांना व्यवसाय करण्यासाठी परवानगी द्यावी अशी सूचना वजा मागणी आ. श्रीमंत छ. शिवेंद्रसिंहराजे भोसले यांनी जिल्हा पोलीस अधीक्षक अजयकुमार बन्सल यांच्याकडे केली होती. आ. शिवेंद्रसिंहराजेंच्या सूचनेनुसार बन्सल यांनी डॉल्बीला सशर्त परवानगी दिली आहे.
डॉल्बी ला परवानगी मिळावी म्हणून साऊंड, लाईट आणि जनरेटर ओनर्स असोसिएशनच्या पदाधिकाऱ्यांनी आ. शिवेंद्रसिंहराजेंची यांची मंगळवारी भेट घेऊन मागणीचे निवेदन त्यांना दिले होते. यावेळी सुनील काळेकर, असोसिएशनचे गणेश शिंदे, सुरेश हादगे, जयवंत कदम, अमित चव्हाण, माणिक आप्पा, प्रतीक भालेकर, संतोष लोंढे, दत्ता शिंदे, तुषार आंबवले, पंकज निकम, कुणाल गोरे, सत्यम नागे, हर्षद चव्हाण आदी उपस्थित होते. असोसिएशनच्या मागणीनुसार डॉल्बी सुरु करणेसाठी शासन दरबारी पाठपुरावा करू आणि उपमुख्यमंत्री ना. देवेंद्र फडणवीस यांच्याकडे हा प्रश्न सोडवण्याची मागणी करू असे आश्वासन देतानाच पदाधिकाऱ्यांच्या समोरच आ. शिवेंद्रसिंहराजेंनी जिल्हा पोलीस अधीक्षक बन्सल यांना दूरध्वनी करून डॉल्बी सुरु करण्याच्या संदर्भाने चर्चा करून व्यावसायिकांना दिलासा देण्यासाठी डॉल्बीला परवानगी द्यावी अशी सूचना केली होती.
दरम्यान, आ. शिवेंद्रसिंहराजेंच्या सूचनेनंतर आज झालेल्या शांतता कमिटीच्या बैठकीत डॉल्बी ला परवानगी देण्याबाबत अधीक्षक बन्सल यांनी सकारात्मक निर्णय घेत डॉल्बीचे दोन बेस आणि दोन टॉप लावण्यास सशर्त परवानगी दिली आहे. यामुळे डॉल्बी व्यावसायिकांचा मोठा प्रश्न सुटला असून व्यावसायिकांमध्ये समाधानाचे वातावरण आहे. डॉल्बी व्यावसायिकांना दिलेला शब्द पूर्ण करून आ. शिवेंद्रसिंहराजेंनी व्यावसायिकांचा मोठा प्रश्न सोडवला आहे. दरम्यान, डॉल्बीला परवानगी दिल्याबद्दल आ. शिवेंद्रसिंहराजेंनी पोलीस अधीक्षक बन्सल यांचे आभार मानले
ओमकार सोनावणे 
