सातारा  : सातारा जिल्हा परिषदेच्या 73 गट व पंचायत समितीच्या 146 गणांच्या आरक्षणाची सोडत गुरुवार दि.28 जुलै रोजी जिल्हाधिकारी कार्यालय व तालुका स्तरावरील तहसील कार्यालयात होणार आहे. त्यामुळे या आरक्षण सोडतीमध्ये कुणाचा पत्ता कट होणार, तर कुणाला लॉटरी लागणार, याकडे लक्ष लागून राहिले आहे. इच्छुकांनी मात्र आपल्या सोयीचे आरक्षण पडावे, यासाठी देव पाण्यात घातले आहेत.

सातारा जिल्हा परिषदेमध्ये पूर्वी 64 गट व पंचायत समित्यांचे 128 गण होते. परंतु, नव्या रचनेनुसार जिल्ह्यात 9 जिल्हा परिषद गटांची वाढ होऊन त्यांची संख्या 73 वर पोहोचली आहे. पंचायत समित्यांच्या गणांमध्ये 18 ची वाढ होऊन ती संख्या 146 वर पोहोचली आहे. जिल्हा परिषद व पंचायत समितीची गट व गण रचना अंतिम झाली होती. मात्र, दि. 13 जुलै रोजी आरक्षण सोडत होती; पण ती पुढे ढकलण्यात आली होती. त्यामुळे आरक्षण सोडत कधी निघणार याकडे इच्छुकांचे डोळे लागून राहिले होते. निवडणूक आयोगाने जाहीर केलेल्या आरक्षण सोडतीच्या नव्या कार्यक्रमानुसार व नवीन रचनेनुसार ही प्रक्रिया होणार आहे. त्यातच आता सर्वोच्च न्यायालयाने स्थानिक स्वराज्य संस्था निवडणुकीत ओबीसी आरक्षण दिले आहे. त्यामुळे महाबळेश्‍वर तालुक्यातील 2 गट व 4 गण, वाईमधील 5 गट व 10 गण, खंडाळ्यातील 3 गट व 6 गण, फलटण तालुक्यातील 9 गट व 18 गण, माणमधील 5 गट व 10 गण, खटाव मधील 8 गट व 16 गण, कोरेगावमधील 6 गट व 12 गण, सातार्‍यातील 10 गट व 20 गण, जावलीतील 3 गट व 6 गण, पाटणमधील 8 गट व 16 गण, कराडमधील 14 गट व 28 गणांमधील ही आरक्षण सोडत ओबीसी आरक्षणासह काढण्यात येणार आहे. दि. 26 जुलै रोजी अनुसूचित जाती, अनुसूचित जमाती, नागरिकांचा मागास प्रवर्ग, महिला यांच्यासाठी आरक्षण सोडतीची सुचना प्रसिध्द केली जाणार आहे. दि. 28 जुलै रोजी जिल्हा परिषद गट व पंचायत समिती गणासाठी आरक्षण सोडत काढण्यात येणार आहे. दि. 29 जुलै रोजी जिल्हाधिकारी सोडतीनंतर निवडणूक विभाग निर्वाचक गणनिहाय आरक्षणाची प्रारुप अधिसूचना प्रसिध्द करणार आहेत. दि. 29 जुलै ते 2 ऑगस्ट अखेर जिल्हाधिकार्‍यांकडे हरकती व सुचना दाखल करण्याचा कालावधी असून दि. 5 ऑगस्ट रोजी जिल्हाधिकारी आरक्षण निश्‍चितीबाबत प्राप्त झालेल्या हरकती व सुचनांचा विचार करुन अंतिम आरक्षण राजपत्रात प्रसिध्द करण्यात येणार आहे.