सातारा : बॉम्बे रेस्टॉरंट चौकातील चहाचे हॉटेल चालवायचे असेल तर दरमहा 5 हजार रुपयांची खंडणी मागून त्यापैकी 2200 रुपये घेवून उर्वरीत पैशांची मागणी करुन कोयता दाखवल्या प्रकरणी दोघांवर सातारा शहर पोलीस ठाण्यात गुन्हा दाखल झाला आहे.

हर्षद संभाजी साळुंखे, जयदीप सचिन धनवडे (दोघे रा.क्षेत्रमाहुली ता.सातारा) यांच्या विरुध्द संदेश राजेंद्र जाधव (वय 24, रा.क्षेत्रमाहुली) यांनी शहर पोलीस ठाण्यात तक्रार दिली आहे.

याबाबत पोलिसांनी दिलेली माहिती अशी, ही घटना दि. 30 मार्च रोजी क्षेत्रमाहुली येथे घडली आहे. तक्रारदार संदेश जाधव हे गावात थांबले होते. त्यावेळी संशयित साळुंखे व धनवडे तेथे गेले. दोघांनी तक्रारदार यांना कोयता दाखवून हॉटेल चालवायचे असेल तर 5 हजाराची खंडणी मागितली. त्यानुसार 2200 रुपये दिले. राहिलेले पैसे दोन दिवसात दिले नाहीतर तुझी अवस्था तुझ्या चुलत्यासारखी करुन गोळ्या घालून जीव घेईन, अशी धमकी दिली. या घडलेल्या घटनेची माहिती तक्रारदार यांनी कुटुंबियांना दिल्यानंतर त्यांनी पोलीस ठाण्यात तक्रार दिली.