कराड: मौजे मांगवाडी(शिवाजीनगर),ता.कराड हद्दीतील माझ्या मालकीच्या चिजदरा नावाच्या शेतशिवारातील ऊस पिकाच्या रानडुकरांनी केलेल्या नुकसानीचा पंचनामा करून भरपाई द्यावी अशी मागणी कळंत्रेवाडी येथील रहिवासी श्री अनिल प्रल्हाद थोरात यांनी लेखी निवेदनाद्वारे वन विभागाच्या वराडे येथील कार्यालयातील अधिकाऱ्यांकडे केली आहे. निवेदनात पुढे म्हटले आहे की, मौजे मांगवाडी(शिवाजीनगर) गावच्या हद्दीत सर्व्हे नंबर १९ मधील चिजदरा नावाच्या शेतशिवारात माझ्या कुटुंबाच्या मालकीचे दोन एकर क्षेत्र आहे. त्यापैकी जवळपास पाच गुंठे क्षेत्रावरील ऊस पिकाचे रानडुकरांनी अतोनात नुकसान केले आहे.दरम्यान, शेताला लागूनच वन विभागाची हद्द असल्यामुळे दरवर्षी वन्य प्राण्यांकडून माझ्या शेतातील पिकांचे अतोनात नुकसान होत असते.तरी माझ्या निवेदनाचा सहानुभूतीपूर्वक विचार करून स्थळ पाहणी करून पंचनामा करावा आणि मला नुकसान भरपाई द्यावी असे निवेदनात म्हटले आहे. दरम्यान, यावेळी वराडे येथील वनपाल सागर कुंभार, वनरक्षक सचिन खंडागळे,वनसेवक शंभूराज माने आदि उपस्थित होते.