सातारा : विद्यार्थी वाहतूक करणाऱ्या वाहनांची तपासणी मोहीम राबवून जिल्हा पोलिस दलाने आज दिवसभरात तब्बल एक हजार ४०० वाहनांची तपासणी केली. त्यातील ८४ वाहनांवर दंडात्मक कारवाई करण्यात आली आहे.

जिल्हाभरात शाळा सुरू झाल्या आहेत. त्यामुळे स्कूल बस, रिक्षा व टेंपो अशा वाहनांतून विद्यार्थ्यांची वाहतूक सुरू झाली आहे. ही वाहतूक सुरक्षित होण्यासाठी विशेष मोहीम राबविण्याचे निर्देश पोलिस अधीक्षक समीर शेख यांनी दिले होते. त्यानुसार आज सर्व पोलिस ठाण्यांचे प्रभारी अधिकारी, सातारा व कऱ्हाड येथील वाहतूक नियंत्रण शाखा व जिल्हा वाहतूक शाखेने एकत्रित मोहीम राबविली.

यामध्ये दिवसभरात एक हजार ४०० वाहनांची तपासणी करण्यात आली. त्यामध्ये ८४ वाहनांमध्ये नियमांचे उल्लंघन होत असल्याचे निर्दशनास आले. त्यानुसार त्यांच्याकडून ३७ हजार रुपये दंड वसूल करण्यात आला. विद्यार्थी वाहतूक करणाऱ्या वाहनांनी सुरक्षित विद्यार्थी वाहतूक करावी, असे आवाहन शेख यांनी केले आहे.