फलटण : फलटण नगर परिषद मध्ये नगराध्यक्ष समशेरसिंह नाईक निंबाळकर यांनी पदभार स्वीकारल्या नंतर नगर परिषदेच्या प्रत्येक कामकाजावर लक्ष केंद्रित केले. अनेक दिवसापासून नूतन नगराध्यक्ष समशेरसिंह यांच्याकडे फलटण शहरातील नागरिकांकडून कर वसुली विभागाच्या कर भरणा विषयी अनेक तक्रारी येत होत्या याबाबत नगराध्यक्ष समशेरसिंह यांनी चौकशी करून व काही नागरिकांना विश्वासात घेतले असता मागील अनेक वर्षांपासून सूर असलेला मोठा कर घोटाळा समोर आला.

याबाबत मिळालेल्या माहितीनुसार, फलटण नगर परिषदेत मागील अनेक वर्षापासून कर वसुली विभागातील अनेक कर्मचारी संगनमताने मोठया थकबाकी असणाऱ्या नागरिकांना विश्वासात घेऊन तुमची थकबाकी कमी करून थकबाकी भरलेले रक्कमेची पावती देतो असे सांगून त्याच्याकडून रोख स्वरुपात एकूण थकबाकी रकमेपैकी काही रक्कम स्वीकारत होती व ती नगर परिषदेच्या खात्यात भरणा न करता स्वतःच्या खिशात घालत असल्याची बाब समोर येत आहे.

त्यानंतर कर वसुली विभागातील सॉफ्टवेअर मध्ये नगर परिषदेच्या ऑपरेटर याला काही रक्कम देऊन लॉगिन करून सॉफ्टवेअर मध्ये काही फेरफार करत थकबाकी रक्कम जमा दाखवून थकबाकी रक्कम जमा असलेल्या पावत्या संबंधित नागरिकांना देत असल्याची माहिती समोर येत आहे. 

अनेक वर्षापासून हा घोटाळा अनेक कर्मचारी यांच्याकडून सुरू होता याबाबत नागरी सुविधा केंद्रातील लिपीक महिला कर्मचारी यांना दबाव टाकत महानेट सॉफ्टवेअर चा लॉगिन आयडी व पासवर्ड मागण्यात आला असता त्यांनी लॉगिन आयडी व पासवर्ड देण्यास नकार दिला असता त्यांना धमकी व शिवीगाळ करण्यात आली होती. 

 नगरपरिषदेच्या वसुली विभागात नागरिकांकडून कर गोळा करून तो स्वतःच्या खिशात घालण्याचा गेल्या अनेक वर्षांपासून सुरू असलेला मोठा भ्रष्टाचार नगराध्यक्ष समशेरसिंह नाईक निंबाळकर यांनी पुराव्यानिशी उघडकीस आणला आहे. या प्रकरणी गठीत केलेल्या चौकशी समितीसमोर काही कर्मचाऱ्यांनी करप्रणालीच्या सॉफ्टवेअरमधून पावत्या डिलीट करून पैसे लाटल्याची धक्कादायक लेखी कबुली दिली आहे.

नगरपरिषदेच्या वसुली विभागातील काही कर्मचारी नागरिकांकडून मालमत्ता कर, घरपट्टी आणि पाणीपट्टीची रक्कम रोख स्वरूपात जमा करून घेत होते. मात्र, ही रक्कम नगरपरिषदेच्या खात्यात जमा न करता ते स्वतःच्या खिशात घालत होते. 

या भ्रष्टाचाराच्या मुळाशी जाण्यासाठी नगराध्यक्ष समशेरसिंह नाईक निंबाळकर यांनी अधिकाऱ्यांची एक समिती स्थापन केली आहे. या समितीसमोर काही कर्मचाऱ्यांनी लेखी जबाब दिले आहेत. एका जबाबात मालमत्ता हस्तांतरण, नवीन नोंदणी, भाडेकरूंची नोंद कमी करणे आणि मूल्यांकनाची कामे करण्यासाठी ५०० ते २००० रुपयांपर्यंत लाच घेतल्याचे एका कर्मचाऱ्याने मान्य केले आहे. तर दुसऱ्या एका जबाबात, नगरपरिषदेच्या 'महानेट' (MahaNet) सॉफ्टवेअरचा गैरवापर करून पावत्या डिलीट करणे आणि रोख रकमेचा अपहार करण्यासाठी दबाव टाकण्यात आल्याची माहिती समोर आली आहे. यात अनेक कर्मचाऱ्यांची नावेही उघड झाली आहेत.

गेल्या अनेक वर्षांपासून फलटण नगरपरिषद भ्रष्टाचाराचे कुरण बनली होती. मात्र, फलटणच्या जनतेच्या घामाचा पैसा शहराच्या विकासासाठीच वापरला गेला पाहिजे, अशी भूमिका नगराध्यक्षांनी घेतली आहे. या प्रकरणात जे कर्मचारी दोषी आढळतील, त्यांच्यावर निलंबनाची कारवाई करून  गुन्हे दाखल केले जातील, 

 "नागरिकाच्या तक्रारीवरून हा प्रकार उघडकीस आला आहे. नगराध्यक्षांनी गठीत केलेल्या समितीच्या माध्यमातून संशयित कर्मचाऱ्यांची सखोल चौकशी सुरू असून, यातील सर्व संबंधितांवर योग्य ती कायदेशीर कारवाई केली जाईल." असा स्पष्ट इशारा समशेरसिंह नाईक निंबाळकर यांनी दिला आहे.