वाठार स्टेशन : महाराष्ट्रातील भाविक भक्तांचे श्रद्धास्थान समजले जाणारे वाठार स्टेशन येथील श्री समर्थ भगवान वाग्देव महाराज यांच्या ८८ व्या पुण्यतिथी निमित्ताने दरवर्षीप्रमाणे याही वर्षी रथोत्सवाचे मोठ्या स्वरूपात आयोजन करण्यात आले होते.
२४ जानेवारी रोजी श्री समर्थ भगवान वाग्देव महाराज यांचा रथोत्सव सोहळा मोठ्या भक्तिमय वातावरणात संपन्न झाला असून या सोहळ्यासाठी महाराष्ट्रातून भाविक भक्तगण मोठ्या उत्साहामध्ये सामील झाल्याचे चित्र दिसून आले. सोहळ्यामध्ये मोठ्या प्रमाणावर भंडाऱ्याची उधळण तसेच जागोजागी फटाक्यांची आतिषबाजी करण्यात आली. जिल्ह्यातील नऊ प्रकारचे बँड तसेच घोडे, डॉल्बी सिस्टीम, जागोजागी भंडारा व फुले उधळण्यासाठी फ्लॉवर गन हे सर्व या सोहळ्यामध्ये विशेष आकर्षण ठरत होते.
सकाळी १० वाजता सज्जनगड देवस्थानचे सोन्ना बुवा रामदासी, जंगली महाराज आश्रम अंबवडे मठाचे मठाधिपती परमपूज्य ब्रह्मानंद बाबा यांच्या शुभहस्ते रथाचे पूजन करून श्री समर्थ भगवान वाग्देव महाराज यांची मिरवणूक संपूर्ण वाठार नगरीत सवाद्य काढण्यात आली. श्री समर्थ भगवान वाग्देव महाराज की जय या जयघोषात संपूर्ण वाठार नगरी दुमदुमून गेली. संपूर्ण गावात चौका चौकात जागोजागी श्री समर्थ भगवान वाग्देव महाराज रथयात्रेचे शुभेच्छा फलक लावण्यात आले होते. जागोजागी स्वागत कमानी उभ्या करण्यात आल्या होत्या. गावातील तसेच पंचक्रोशीमधील भाविक भक्तगण मोठ्या प्रमाणात अन्नदान तसेच पाणी वाटप, सुगंधी दूध वाटप करताना दिसून येत होते.
संपूर्ण मंदिर व मंदिर परिसरामध्ये आकर्षक विद्युत रोषणाई करण्यात आली होती. श्री समर्थ भगवान वाग्देव महाराज देवस्थान ट्रस्टचे अध्यक्ष मा. निवृत्ती भाऊ करे यांनी सांगितले की, दरवर्षी रथोत्सव सोहळा हा दिवसेंदिवस वाढत चाललेला आहे त्याचप्रमाणे वर्षभर पौर्णिमेनिमित्ताने विविध कार्यक्रम तसेच कीर्तनाचे आयोजन केले जाते. वर्षभर येथे अन्नदान होत असते. भावीक भक्तगणांना समर्थांची प्रचिती आल्याने सढळ हाताने ते वेळोवेळी मदत करताना दिसून येतात. संपूर्ण जिल्ह्यामध्ये हा रथउत्सव सोहळा पाहण्यासाठी व देवांचे दर्शन घेण्यासाठी भाविक भक्तगण रांगाच रांगा लावताना दिसून येत आहेत. यावर्षी सात दिवस चाललेल्या या पारायण सोहळ्याला महाराष्ट्रातून नामवंत व सुप्रसिद्ध कीर्तनकारांची मांदीयाळी पहावयास मिळाली. त्याचप्रमाणे अन्नदात्यानी अन्नदान ही मोठ्या सढळ हाताने केले. येत्या काळात देवस्थानचा मोठ्या प्रमाणात कायापालट होणार असून विविध विकास कामांच्या माध्यमातून हे सर्व शक्य होणार आहे असे निवृत्तीभाऊ करे यांनी सांगितले.